مجاريح – حسين ال لبيد

من عقب ماجوني وقالو مجاريح
يا للاسف داويتهم واجرحوني

سكنتهم صدري على هبة الريح
ويا للاسف اكرمتهم واجحدوني

اقوم لرضاهم على ساق واطيح
كبرتهم يا قلب واستصغروني

وانا الحزين اللي همومي مرازيح
ارخي على حمل الليالي امتوني

وانا خفا سدي على الناس ما بيح
مغير اطوح للقصيد اللحوني

يا نود هبيني هبوب المراويح
هبي على صدري لفايض اشجوني

وفيت معهم من محبه وتصحيح
ويوم استويت لهم ياقلب اطعنوني

يا ويح يابعض العلاقات يا ويح
مغير هوني يا المشاريه هوني

بغيتها تلميح ماجات تلميح
قصيدةٍ غنا بها حزن لوني

وشلون اعديها وانا اون واصيح
انا اشهد انهم يا الزمان اوجعوني

جوني وانا فال الوجيه المفاليح
وياليتهم عقب الغدر فارقوني

كلمات: حسين ال لبيد

ضيعتني – فهد بن فصلا

الله يسامحك ضيعتني من يديك
قلت لك لا تخليني وخليتني

اعتبرني مثل الفرصه وراحت عليك
كم تمسكت فيك وكم هديتني

وش أسوي مدام النفس ماتشتهيك
شف فعلك وجرحك وين وديتني

ايه كانت مشاعر خاطري ترتجيك
واكذب ان قلت في صدك ماهميتني

مت أدور ارضاك وصرت منك واليك
جيت لك الف مره بس رديتني

المحبه بدت بك قبل لاتنتهيك
كنت ابوها ولكنك ما سميتني

يوم كانوا معك ونا اسهرك واحتريك
وذكر الشوق ما جابك ولا جيتني

يوم راحوا رجعت وقلت مشتريك
كن ما كنت انا ديلك ولا واحيتني

لاتحاول تكذب جعل ربي يهديك
لا تمثل ونا خابر ما حبيتني

وبعد ماحبيت غيرك جيتني قلت ابيك
لا تقول أني خنتك انت حديتني

الله يسامحك ضيعتني من يديك
قلت لك لاتخليني وخليتني

كلمات: احمد المجاحمه

عبدالله ال مخلص – ياهل العوجاء

ياجليل الملك بيرق من نصاك يرزّي
ياملاذ المستجير اسمك ذراي وعزّي

مالي الا ذكرك وذكرك سلاح المؤمن
حزّةٍ فيها النفوس من النفوس تقزّي

احتما الموقف وجيت اسابق الخياله
جيت للمضمار والوجه العزيز يعزّي

راكبٍ صفراً حوافرها تشقّ البيداء
ناصيتها تنتخي بي والرماح تهزّي

من مرابط عادياتٍ ندّرٍ سبّقها
كل ماحدّت على فضّ الصفوف تفزّي

تجبد النخوه وانا اصوت لها وازهمها
واعتزي وأقول يابنت الرياح اعتزّي

في نبأ عبدالعزيز موحّد الجزيره
ثاقب النظره عدوّ الغاشم المبتزّي

ناحر الجهل بخناجر هقوته وعزومه
النجايب مفحماتٍ والخيول تلزّي

نادرٍ حوّل على نجد ولطم عايلها
وارتفع صوتٍ ينادي للفخر والعزّي

الحكم لله ثم لعبدالعزيز الفيصل
كل الاسماء فالجزيره تحت حكم معزّي

الشجيع الأصوك المتندّر المتسيّد
اعتزى والدم فاير والدقون تجزّي

يا هل العوجاء عزاويكم تجري الهايب
روس قومٍ رميكم كزّ وطعنكم دزّي

الحكم لأخوان نوره والولاء واجبنا
والبيارق بأمر ربي فالجبال ترزّي

كلمات: فلاح ال مخلص

عبدالله ال مخلص – جرح المعنى

الصد سقم الحبايب والود كنه الهبابب
والقلب في الزين ذايب والحب جرح المعنى

والي ماتخلف ظروفه متهني في هنوفه
اكفوفها في كفوفه ماذاق جرح المعنى

مدام كل مكانه احاول اجلس وزانه
حتى تطيح الميانه من دون جرح المعنى

مليت ويش الطريقه ودي بشوفه دقيقه
نكشف وجيه الحقيقه ونكب جرح المعنى

فقدة حلو الشرابي كنه مروح شبابي
اون محد درابي جربت جرح المعنى

ياعود موز تبّين امن الهوا لاتليّن
صعب ماهو لي بهيّن يزيد جرح المعنى

ارفق بحال الشقاوي الجرح طاويه طاوي
وين الطبيب المداوي يشوف جرح المعنى

يا ام العيون الكحيله ماكن للكحل ميله
دون الرموش الظليله هي طب جرح المعنى

هونش على القلب هونش وانا مع الوقت عونش
حضش بصدرً يصونش من ظلم جرح المعنى

الله يعين المولع من جيز ناس مقلع
مخروم حب وتولع والحب جرح المعنى

كلمات: عبدالله الرزقي

هذا السعودي فوق فوق – فهد بن فصلا

الله أكبر وأبتداء قاف مماشيه القداء
ياسم على كبود العداء هذا السعودي فوق فوق

يا أطهر بلد وأغلى بلد من دون حدك نتحد
ولسيدي صنا العهد هذا السعودي فوق فوق

يا بيرق التوحيد فوق فوق العلالي والبروق
المجد بك دايم يلوق هذا السعودي فوق فوق

في ظل كنق المملكه سلمان والعز أدركه
والمجد دربه يسلكه هذا السعودي فوق فوق

أبو العزم وأبو الحزم سلمان سلمان العزم
يقدم وللخصم يخزم هذا السعودي فوق فوق

ياسيدي وأرقى سنود الشعب كله لك جنود
اشر وندعس للحشود هذا السعودي فوق فوق

وصيه من أجدادنا ومورثه لأحفادنا
الموت لأجل بلادنا هذا السعودي فوق فوق

عمار يا داري عمار طفره ونهضه وأزدهار
للعز يا أغلى الديار هذا السعودي فوق فوق

سلام يا أمير الشباب يا سيدي دمث الجناب
ياللي طموحك للسحاب هذا السعودي فوق فوق

الشعب يدعم رؤيتك يامحنك بعقليتك
ويالصارم بشخصيتك هذا السعودي فوق فوق

أمن العرب من أمننا واللي يخالف سلمنا
يخاطب برمح وقنا هذا السعودي فوق فوق

جنودنا وقت الخطر تعطش على الموت الحمر
جويه وبر وبحر هذا السعودي فوق فوق

كلمات: احمد الجويدي

نسناس الهوى – فلاح المسردي

هب نسناس الهوى اللي من مهبه
كر جمر الشوق واحرقني لهيبه

والبلا ان الجمر في قلبي مشبه
وقلبي شب بكل ضلعن يحتمي به

ياهل العشق الحقيقي والمحبه
لاحدن عندي يطري لي حبيبه

خافوا الله فيني وفي اللي احبه
وادعوا الله يا عسى ربي يجيبه

وبشروني عنه قولوا لي ياربه
ما نسى اللي ما نساه ومكتفي به

والله انه جرح قلبي وانه طبه
ولجله اتهون الكليفه والصعيبه

في غيابه كل يوم يزود حبه
وكل يوم أصون حبه واعتني به

والوفى له والغلا له والمحبه
جعل يسقى يوم اشوفه والتقي به

علموا اللي فالوصل ماخاف ربه
المفارق موت وجروحه عطيبه

اسالوا من فارق أغلى من يحبه
وصار دمعه عادي ونفسه كئيبه

وانت يالي من فراقك صرت أسبه
شف عيوني شف محاجرها شحيبه

انت قلبك مثل قلبي والا صبه
لعنبو ذا القلب وش عادك تبيبه

حس والا حن فاللي ما يشبه
من وفاه وفي غلاه وكل طيبه

وان نويت تروح عادي من احبه
من احبه والله أني ماهتني به

المشاعر ما تموت بدون سبه
والخواطر ما تجبر بالغصيبه

وكبرياء النفس ما بين الاحبه
اول اسباب الجفاء واكبر مصيبه

كلمات: تركي العاطفي

منحرم وصلك – بندر بن عوير

منحرم وصلك وانا قلبي ضعيف
ما اتحمل غيبتك لو ثانيه

ودمع عيني مايوقف بالنزيف
الحياه بدون شوفك فانيه

لاتشمت بي العدا خلك حليف
والمشاعر كلها لك عانيه

العجايب سبع وانته يا لطيف
من جمالك اصبحت ثمانيه

ينشغل بالي بزينك يا وليف
لو معي ربعي وكل اخوانيه

كيف تبعد عن هوى مغليك كيف
وانت حالف نذر ما تنسانيه

لو تعذبني غدى حالي كليف
لك مشرع فـ الهوى بيبانيه

انت كيف فارق عن كل كيف
صرت ملهمني على قيفانيه

يا خشيف الريم لي مالك وصيف
خايف تبطي ولا تلقانيه

واشهد انك يالمفارق حد سيف
يوم ارقت العيون الهانيه

منحرم وصلك وانا قلبي ضعيف
ما اتحمل غيبتك لو ثانيه

ودمع عيني مايوقف بالنزيف
الحياه بدون شوفك فانيه

كلمات: علي الهاملي

انا اصدق – فهد بن فصلا

خذني على قد حبي لك وداريني
الله ولا الكلمه الي تكسر الخاطر

شف كيف حبك على دربك يسريني
ما قلت له غير تامر بالهوى وحاضر

انا اصدق الناس كانك صدق شاريني
ونا اطهر العشق في سري وفِي الظاهر

ونا اللذي قلت لك ماعاد يمديني
أتجاهلك كيف وطحت بغلطة الشاطر

لامر طيفك اضمه حيل في عيني
ياكيف يقوى يسهرني وهو عابر

اسامره لي احسك تلمس ايديني
والاغرب اني اشوفك ونت مو حاضر

خذني على قد حبي لك وداريني
العقل مرات مايستربه الخاطر

كلمات: فيصل العدواني

على العهد باقي – غريب ال مخلص

على العهد باقي وللحب باقيين
اصل المفارق ماحسبنه حسابه

ياصاحبي وين انت رايح على وين
جرحي عميق وزايدن بالتهابه

تقفي وتدري ماتبع الي مقفين
تصد وانا مالقيت الاجابه

ابغي اوصلك رسالة محبين
قفو وانا لي من وراهم طلابه

الوصل نعمه والمفارق عما العين
وحظي معك بذات ماينعدابه

هموم فوق هموم والحزن والبين
في كل ليلن فوق راسي سحابه

حالي نحل والقلب فجر براكين
كلام من يغليك جاك بخطابه

انا تراني صرت ضمن المجانين
من عقب صدك عايشن في كابه

عزاه ياقلبي ويا حالي الشين
عزاه ياجرحن نزف من صوابه

لاغاب عني زود الجرح جرحين
وارقب طوال اليل جاري الكتابه

امسح شطر واكتب شطر واسهر الين
يبين نور الصبح ويفج بابه

انا تراني من رجالن مسمين
انشهد ان لي في المواقيف لابه

لانتبع المقفي ولا حن براجيين
مانتبعه لو كان طول غيابه

وانتي ترا بنت الشيوخ السلاطين
اهل المواقف والقسى والصلابه

من له يشوف بعين مالد له عين
لو كان غالي مارجينا جنابه

كلمات: نايف العاض

دلني وين بيتك – فهد ال فصلا

ياحبيبي فديتك دلني وين بيتك
كانني مالقيتك شيب عيني واحالي

للمحبه حكاية واشتياق ورواية
وانت كل الهدايا ياحسيل الدلالي

ابحرت بي دقيقة والبحر له طريقه
واشهد اني غريقه لو بعيني حبالي

يامزون السحابه خيري تو بابه
وامطريني لقاء به كان جالي مجالي

رفرفي يالحوني صوب غرو فتوني
ما سرى من عيوني يوم اشوفه قبالي

من سمر لحن شيله وانهمر نوى سيله
خله الشعر ليله غير كل الليالي

لو عليها اتغنى واحتري واتمنى
لين اجي واتهنى بالسعد راس مالي

ما تنحيت عنه دام شوفته جنة
لي فؤادا يحنه من نسيم الظلالي

خذ فؤادي ونبضه واسكن بكل عرضه
والمشاعر على ارضه كلها لك حلالي

اتعدى المجره وانت للقلب دره
حطه الله وقره بين الاضلاع غالي

والله انك حبيبي والهوى بك نصيبي
ليتني لك قريبي يا دواء ضيق بالي

اسكن الصدر دارك والمحبة مدارك
وامنع القلب نارك ما ذخرتك سوى لي

ياحبيبي فديتك دليني وين بيتك
كانني مالقيتك شيب عيني وحالي

للمحبة حكايا واشتياق ونواية
وانتي كل الهدايا ياحسين الدلالي

كل ما اوحيت اقولك ضعت في طيف زولك
بين ريقك ولولك والرموش الطوالي

ابحرت بي دقيقة والبحر له طريقة
واشهد اني غريقة لو بعيني حبالي

ما هجعت بوصاله وما قويت انفصاله
ولا قطعت اتصاله كنه اغلى عيالي

كل ريفا يحله يزهي الورد ظله
راهي العد من له غير شرا زلالي

يا مزون السحابة خيلي تو بابه
وامطري لي لقى به دام جالي مجالي

انتمي له واحبه والهوى من مهبه
وينه اللي لعبه به يوم انا له موالي

وصليني مرامي يم عطف اللثامي
يا بحور الغرامي موج الاشواق عالي

ياعرب ذي حروفي قبل وصل الكفوفي
من شعوري وشوفي واكثر الناس سالي

كلمات: خالد الوليدي