يابوي انا جيت لك – عبدالله العنزي

يابوي انا جيت لك والنفس ندمانه
وفالقلب نار تشب وتشعل اشعالي
ولدك تاه الطريق وكثرت احزانه
شرب المراره وغيره يشرب الحالي

رح خل ينفعك من طاوعت شيطانه
صاحبك راعي الوفاء اللي ماله امثالي
صديقك اللي يعدك ثالث اخوانه
وشلون خلاك في وقت الضيق للصالي

يابوي عطفك رميت الروح باحضانه
نثرت دمعة سجين شاف الاهوالي
لاعاد تذكر لي الماضي وخلانه
راحوا وشفني وحيد جالس لحالي

غرتك دنياك والايام خوانه
رضيت بالصحبة الحسنه بالانذالي
واغضبت ابوك وفضحته بين جيرانه
نزلت راسه وهو في مامضى عالي

انت السبب فالخطاء وانا ادفع اثمانه
اهملتني وانشغلت بجمع الاموالي
خليتني للهوى وابليس واعوانه
يلعب الجهل من جال اليا جالي

انا اجمع المال واتعب حيل من شانك
قرش على قرش وريال على ريالي
واشري لك اللي تبي من وسط دكانه
وتختار سيارتك لو سعرها غالي

يابوي انا جيت والعينين غرقانه
تايب عن الذنب وارجي رحمة الوالي
السجن قطع فؤادي صمت جدرانه
ظلمه زواياه عنها موتي اشوا لي

تعال ياروح ابوك ونبض وجدانه
لاعاد تشكي وتبكي يابعد حالي
الذنب ذنبي وصار وشفت برهانه
قررت اخلي الطمع واهتم بعيالي

استغفر الواحد المعبود سبحانه
من رفقة السوء احذر كل الاجيالي
وانا اوصي الاب من فضله واحسانه
لاتشغله عن عياله كثر الاعمال